TIRANË- Kryetari i Kuvendit, Gramoz Ruçi, i ka dërguar një letër urimi presidentit të Parlamentit (Riigikogu) të Estonisë, Henn Põlluaas, me rastin e Ditës së Pavarësisë.
“Me rastin e Ditës së pavarësisë së Republikës së Estonisë, në emër të Kuvendit të Republikës së Shqipërisë dhe emrin tim personal, Ju përcjell urimet e mia më të përzemërta. Shpallja më 23 shkurt të vitit 1918 e Manifestit të të Gjithë Qytetarëve dhe publikimi i tij më 24 shkurt shënoi themelimin e republikës së pavarur dhe demokratike të Estonisë. Këto dy ditë janë ngjarje të shënuara me rëndësi historikë për popullin estonez dhe të ardhmen e tij”, shkruan Ruçi.
“Estonia është një vend mik dhe partner i Shqipërisë në NATO si edhe një mbështetëse e fuqishme e integrimit tonë europian, kontribuese e spikatur në vendimin e Këshillit Europian të datës 25 mars 2020 për çeljen e negociatave dhe asistencën në këtë proces. Memorandumi i Mirëkuptimit për Integrimin Europian, midis Ministrive të Punëve të Jashtme të dy vendeve tona, nënshkruar në tetor 2019, është një tregues i këtij kontributi”, thekson Ruçi.
“Shqipëria i është mirënjohëse Estonisë edhe për mbështetjen e vazhdueshme ndaj Kosovës dhe aspiratave të saj auro-atlantike. Shpreh bindjen se Kuvendi i Republikës së Shqipërisë dhe Riigikogu i Republikës së Estonisë do të vazhdojnë të kontribojnë në forcimin e marrëdhënieve e bashkëpunimit midis të dy vendeve e dy popujve tanë”, shkruan në letrën e urimit Kryetari i Kuvendit, Gramoz Ruçi.
